Wednesday, February 20, 2008

ഹര്‍ത്താല്‍ദിന പ്രത്യേക പരിപാടികള്‍ sponsored by...

സംഭവിച്ചതെല്ലാം നല്ലതിന്‌. സംഭവിക്കാനിരിക്കുന്നതും നല്ലതിന്‌. പിന്നെന്തിന്‌ ഹര്‍ത്താലിനെതിരെ ജനവികാരം ഉയര്‍ന്നുവരണം?
തിരക്കുപിടിച്ചതും ആക്രാന്തം നിറഞ്ഞതുമായ പുതിയ ജീവിതശൈലി മലയാളിക്ക്‌ സമ്മാനിച്ച മാനസിക സംഘര്‍ഷങ്ങള്‍ക്ക്‌ ഒരിടവേളയാകുന്നു ഹര്‍ത്താല്‍!

ആറുനാള്‍ ജോലിയെടുക്കുകയും ഏഴാം നാള്‍ വിശ്രമിക്കുകയും ചെയ്യണമെന്ന യഹോവയുടെ കല്‍പ്പനയുടെ ഭാഗമായാണ്‌ സണ്‍ഡേ ഹോളിഡേയാക്കിയത്‌.

കല്യാണങ്ങള്‍, പുരതാമസം തുടങ്ങി നൂറുനൂറ്‌ ആഘോഷങ്ങള്‍, നെറ്റ്‌വര്‍ക്ക്‌ മാര്‍ക്കറ്റിംഗുകാരുടെ ആവേശദായക യോഗങ്ങള്‍ തുടങ്ങി അറുബോറന്‍ സാംസ്ക്കാരിക സമ്മേളനങ്ങള്‍ വരെയുള്ള നൂറുകൂട്ടം പരിപാടികള്‍ ഒക്കെയും സണ്‍ഡേ സാധാരണ ഡേയേക്കാളും തിരക്കേറിയതാക്കിയിരിക്കുന്നു നമ്മുടെ നാട്ടില്‍.

ഇനിയിപ്പോള്‍ എല്ലാവരെയും വിശ്രമിപ്പിക്കാന്‍ ഹര്‍ത്താലല്ലാതെ വേറെന്തു വഴിയുണ്ട്‌?

ഇന്നലത്തെ ഹര്‍ത്താല്‍ തന്നെയെടുക്കുക. ഹര്‍ത്താല്‍ ആഹ്വാനം ചെയ്ത ചാണ്ടിയും കൂട്ടരും മുതല്‍ ഹര്‍ത്താലിനെ എതിര്‍ത്ത മുഖ്യനും കൂട്ടരും വരെ സ്വസ്ഥമായി വീട്ടിലിരുന്നു. സകല പാര്‍ട്ടികളിലും പെട്ടവരും ഒന്നിലും പെടാത്തവരും എല്ലാരും വീട്ടിലിരിക്കുന്ന ദിവസമായതിനാല്‍ ഇനിമുതല്‍ ചാനലുകള്‍ക്ക്‌ ഹര്‍ത്താല്‍ ദിന പ്രത്യേക പരിപാടികള്‍ സംപ്രേഷണം ചെയ്യുന്നതിന്റെ സാധ്യത ആരായാവുന്നതാണ്‌.

'സ്ട്രെസ്‌ മാനേജ്മെന്റ്‌' എന്ന വിഷയത്തില്‍ പ്രഗല്‍ഭന്മാരുടെ പ്രഭാഷണ വെടികള്‍, ധ്യാനപരിപാടികള്‍, രണ്ടോ മൂന്നോ തമാശപ്പടങ്ങള്‍, മിമിക്സ്‌ പരേഡുകള്‍ എന്നിങ്ങനെ സകല മനോസംഘര്‍ഷക്കാരനെയും സംഘര്‍ഷരഹിതനാക്കാനുള്ള പരിപാടികള്‍ ഹര്‍ത്താല്‍ ദിനത്തില്‍ പ്രയോജനം ചെയ്യും (സീരിയല്‍ ഒഴിവാക്കണം, പ്ലീസ്‌).

ഓണം, വിഷു, ക്രിസ്മസ്‌, ഈസ്റ്റര്‍, റംസാന്‍, ബക്രീദ്‌ തുടങ്ങിയ ആഘോഷാവസരങ്ങളിലേതുപോലെ കേരളീയരായ ദരിദ്രന്മാര്‍ക്ക്‌ ഹര്‍ത്താല്‍ പ്രമാണിച്ച്‌ സൗജന്യ റേഷന്‍ അനുവദിച്ച്‌ സര്‍ക്കാരുകള്‍ക്ക്‌ ജനക്ഷേമം നടത്താവുന്നതുമാണ്‌.

തലേ ദിവസത്തെ തിരക്ക്‌ നിയന്ത്രിക്കാന്‍ ഹര്‍ത്താല്‍ സ്പെഷ്യല്‍ കൗണ്ടറുകള്‍ തുറക്കാന്‍ ബീവറേജസുകാര്‍ക്ക്‌ നടപടികള്‍ എടുക്കാവുന്നതാണ്‌.

പത്രമാധ്യമങ്ങള്‍ക്ക്‌ ഹര്‍ത്താല്‍ ദിനത്തില്‍ വാലന്റൈന്‍സ്‌ ഡേ ആശംസാ പരസ്യംപോലെ ഹര്‍ത്താല്‍ ആശംസാ പരസ്യങ്ങള്‍ അടിച്ച്‌ കാശുവാരാവുന്നതാണ്‌.

ഹര്‍ത്താല്‍ദിന സമ്മാനങ്ങള്‍ എന്നൊരു കലാപരിപാടികൂടി പുതിയതായി നാട്ടുനടപ്പാക്കാവുന്നതുമാണ്‌. വാലന്റൈന്‍സ്‌ ഡേ, കൗമാരക്കാരും കാമുകീകാമുകന്മാരും ഭാര്യാഭര്‍ത്താക്കന്മാരുംകൂടി 3000 കോടി രൂപയുടെ സമ്മാനം കൊടുത്ത്‌ അടിപൊളിയാക്കിയ സാഹചര്യത്തില്‍ ഹര്‍ത്താല്‍ഡേ ഗിഫ്റ്റ്‌ ഒരു പതിനായിരം കോടിയുടെ കച്ചവടത്തിനുള്ള സാധ്യതയെങ്കിലും തുറക്കും.

ഹര്‍ത്താല്‍ ദിനത്തില്‍ ചികിത്സ കിട്ടാതെ ചത്തുപോകുന്ന പൗരന്മാരെ രക്തസാക്ഷികളായി പ്രഖ്യാപിച്ച്‌ സ്മാരകങ്ങള്‍ പണിയാവുന്നതാണ്‌. ആയിനത്തില്‍ വാര്‍ഡുകള്‍ തോറും ഓരോ സ്മാരക നിര്‍മാണ കമ്മറ്റി രൂപീകരിക്കാവുന്നതുമാണ്‌. ഒരുപാടു തൊഴില്‍രഹിതരായ നേതാക്കള്‍ക്ക്‌ സ്ഥിരവരുമാനമേകാന്‍ ഈ കമ്മറ്റികള്‍ക്കാവും എന്ന സാധ്യതയും തെളിഞ്ഞുവരുന്നുണ്ട്‌.

ഏറ്റവും കൂടുതല്‍ ഹര്‍ത്താല്‍ പ്രഖ്യാപിക്കുന്ന നേതാവിന്‌ സംസ്ഥാന സര്‍ക്കാരിന്റെ പുരസ്ക്കാരം കൂടി സമര്‍പ്പിക്കാവുന്നതാണ്‌. ഭൗതികമായി എന്തൊക്കെ നേടിയാലും മനഃശാന്തിയില്ലാത്ത സമൂഹത്തിന്‌ ഒരു ചുക്കും ചെയ്യാനാവില്ല.

മനഃശാന്തിയാണ്‌ പ്രധാനം.
ഹര്‍ത്താല്‍ മനഃശാന്തി നല്‍കുന്ന കഷായമാണ്‌. ആദ്യം അത്‌ കയ്ക്കുമെങ്കിലും പിന്നീട്‌ ജീവിതം മധുരതരമാക്കും!

2 comments :

  1. Priya said...

    "മനഃശാന്തിയാണ്‌ പ്രധാനം.
    ഹര്‍ത്താല്‍ മനഃശാന്തി നല്‍കുന്ന കഷായമാണ്‌. ആദ്യം അത്‌ കയ്ക്കുമെങ്കിലും പിന്നീട്‌ ജീവിതം മധുരതരമാക്കും! "

    ഹര്ത്താല് നീണാള് വാഴട്ടെ !!!

    :D

  2. മറ്റൊരാള്‍\GG said...

    :)