കണ്‍ട്രി ഓഫ്‌ ഓള്‍ഡ്‌ മെന്‍
ഇത്‌ 'ഓള്‍ഡ്‌ മാന്‍'മാരുടെ കാലമാണ്‌!
'നോ കണ്‍ട്രി ഫോര്‍ ഓള്‍ഡ്‌ മെന്‍' നാല്‌ ഓസ്കാര്‍ പുരസ്കാരങ്ങള്‍ സ്വന്തമാക്കിയിരിക്കുന്നു. കേരളത്തില്‍ ഒരു ഓള്‍ഡ്മാന്‍ രണ്ട്‌ ഡിസിസികള്‍ സ്വന്തമാക്കാന്‍ പോകുന്നു. കോണ്‍ഗ്രസിലേക്ക്‌ ഒടിഞ്ഞുമടങ്ങിയെത്തിയ ഓള്‍ഡ്മാന്റെ സഹയാത്രികരായ രണ്ടുപേരെ തിരുവനന്തപുരം, തൃശൂര്‍ ഡിസിസി പ്രസിഡന്റുമാരാക്കാനാണ്‍്‌ ധാരണയായിരിക്കുന്നത്‌.
ഓള്‍ഡ്മാനെ യാതൊരു കാരണവശാലും തറവാടിന്റെ പടി കയറ്റരുതെന്നും പറഞ്ഞ്‌ ഡല്‍ഹിയില്‍പോയി 'ധര്‍ണ' നടത്തിയ ചാണ്ടിയെ വെട്ടി നിരത്തിയാണ്‌ കിഡ്വായി-ചെന്നിനായകന്‍ സഖ്യം ലീഡറുമായി ധാരണയുണ്ടാക്കിയത്‌!
'നോ കണ്‍ട്രി'ക്കു നാല്‌ ഓസ്കാര്‍ കിട്ടിയ സാഹചര്യത്തില്‍ കോഴിക്കോട്‌, കാസര്‍കോഡ്‌ ഡിസിസികളും തനിക്കുവേണമെന്ന്‌ ആ 'ഓള്‍ഡ്മാന്‍' ആവശ്യപ്പെട്ടിട്ടുണ്ട്‌!
കൊച്ചു കേരളത്തെ നയിക്കുന്ന ഒരു 'ഓള്‍ഡ്മാന്‍' കോട്ടയത്തുനിന്നും ഒരു പ്ലാസ്റ്റിക്‌ കുപ്പിയും യംഗ്‌ ആന്റ്‌ സ്ട്രോംഗ്‌ മാന്‍ പിണറായിയുടെ പരസ്യ ശാസനയും പുരസ്കാരമായി ഏറ്റുവാങ്ങി ഒതുങ്ങിയിരിക്കുന്നതും ഓസ്കാര്‍ അവാര്‍ഡ്‌ പശ്ചാത്തലത്തില്‍ തന്നെ കാണണം.
കൊല്ലം സ്വദേശിയായ ഒരു വിപ്ലവ പാര്‍ട്ടിയുടെ സംസ്ഥാന നായകനായ ഓള്‍ഡ്മാനെ സംസ്ഥാന സമ്മേളനത്തില്‍ വേറൊരു ഓള്‍ഡ്മാന്‍ തറപറ്റിച്ചതിന്റെ ഞെട്ടല്‍ ഞെട്ടിത്തീരുംമുന്‍പേ ചന്ദ്രനെ ചൂടിയ ഓള്‍ഡ്മാന്‍ ദേശീയ ജനറല്‍ സെക്രട്ടറിയായി തിരികെയെത്തി പിണറായിയെവരെ ഞെട്ടിച്ചിരിക്കുന്നു!
വേറൊരു ഓള്‍ഡ്മാനുണ്ട്‌. ആള്‍ സര്‍ക്കാരാപ്പീസുകളില്‍ മാറാലയില്‍ മൂടി ഇരിപ്പായിരുന്നു. അന്നേരം ഹൈബി ഈഡന്‍ എന്നൊരു പയ്യന്‍ പല്ലില്ലാത്ത മോണകാട്ടി ചിരിക്കുന്ന ആ ഓള്‍ഡ്മാനെ പൊടിതട്ടി പുറത്തെടുത്തിരിക്കുന്നു.
ഇന്ത്യയെന്ന കണ്‍ട്രിയുടെ ആത്മാവ്‌ വെറും കണ്‍ട്രികള്‍ തിങ്ങിപ്പാര്‍ക്കുന്ന ഗ്രാമങ്ങളില്‍ ചത്തുമലച്ചു കിടക്കുന്നുവെന്ന്‌ തോന്നിയതിനാലല്ല; കമ്യൂണിസ്റ്റ്‌ പാഠപുസ്തകങ്ങളെ ചെറുക്കാനാണ്‌ ഓള്‍ഡ്മാനെഴുതിയ 'എന്റെ സത്യാന്വേഷണ പരീക്ഷണങ്ങള്‍' ഹൈബിയും കൂട്ടരും പ്രചരിപ്പിക്കാന്‍ തുനിഞ്ഞിറങ്ങിയതെന്നും ആള്‍ തുറന്നു പറഞ്ഞിരിക്കുന്നു. കൊടുക്കൂ ഹൈബിക്കൊരു ഓസ്കാര്‍!
ഒരിക്കല്‍ ചരിത്രപരമായ മണ്ടത്തരം പറ്റിയതിനെ തുടര്‍ന്ന്‌ പാര്‍ട്ടിക്കും തനിക്കും രാജ്യത്തിനും ഒരുപാടു കെടുതികള്‍ പറ്റിയെന്ന വൈക്ലബ്യത്തില്‍ കഴിയുന്ന വംഗനാട്ടിലെ ഒരു ഓള്‍ഡ്മാന്‍ താനിനി പൊളിറ്റ്ബ്യൂറോയിലേക്കില്ലായെന്ന നിലപാടെടുത്തിരിക്കുന്നു!
ലോകത്തെ കിടുകിട വിറപ്പിക്കുന്ന അമേരിക്കയെ കിടുകിട വിറപ്പിച്ചുപോന്ന കമ്യൂണിസ്റ്റ്‌ ക്യൂബയില്‍ മഹാനായ ഓള്‍ഡ്മാന്‍ നായകസ്ഥാനമൊഴിഞ്ഞ്‌ സഹോദരനായ ഓള്‍ഡ്മാനെ നായകനാക്കിയിരിക്കുന്നു.
ആലോചിച്ചു നോക്കൂ... ഓള്‍ഡ്മാന്മാരുടെ കാലമാണിനി.
വെറുതെ നരച്ചമുടിയില്‍ ബ്ലാക്ക്‌ ജപ്പാനടിച്ച്‌ പ്രായം കുറച്ചുകാണിച്ചു നടക്കേണ്ട കാര്യമില്ല. വെറുതെ ഒരു ഓസ്കാര്‍ കളയേണ്ട! അഖില ലോക ഓഡ്മെന്‍സ്‌ അസോസിയേഷന്‍ സിന്ദാബാദ്‌!
1 comments :
ഇത്രയും നാള്‍ വാസ്തവം ടീം എഴുതിയതില്‍ വച്ചു ഏറ്റവും മികച്ചത്. നല്ല സാര്‍ക്കാസം. കലക്കിയിട്ടുണ്ട്.
Post a Comment