കനകം മൂലം...
നമ്മള്‍ മനുഷ്യന്മാരുടെ സങ്കടങ്ങളൊന്നും വലിയ സങ്കടങ്ങളല്ല!
പെരുവഴിയേ നടന്നുപോവുമ്പോള്‍ ബൈക്കില്‍ ചീറിപ്പാഞ്ഞെത്തുന്ന ഹെല്‍മറ്റ്‌ തലയന്‍ നാണിയമ്മയുടെ ഒരു പവന്റെ താലിമാല കവര്‍ന്നുകൊണ്ടുപോകുമ്പോള്‍ നാണിയമ്മക്കുണ്ടാവുന്ന സങ്കടത്തിന്‌ പതിനായിരം രൂപ വിലവരും.
അന്നേരം നാണിയമ്മ കരുതും ലോകത്തിലെ ഏറ്റവും നിര്‍ഭാഗ്യവതി താനാണെന്ന്‌. സത്യം പറഞ്ഞാല്‍ ഭാഗ്യ നിര്‍ഭാഗ്യങ്ങളില്‍ വല്യ കഴമ്പില്ല. നാലുകെട്ടിന്റെ സുവര്‍ണജൂബിലി അടിച്ചുപൊളിച്ച്‌ ആഘോഷിച്ച എംടിയെ കണ്ടപ്പോള്‍ എംടി എന്തൊരു ഭാഗ്യവാന്‍ എന്നു തോന്നിയവരാണു നമ്മള്‍ മലയാളികള്‍.
എന്നാലിപ്പോള്‍ വെറും അഞ്ചു വോട്ടിന്‌ കേന്ദ്ര സാഹിത്യ അക്കാദമി ചെയര്‍മാന്‍ സ്ഥാനം ചുണ്ടിനും കപ്പിനുമിടയില്‍ നഷ്ടപ്പെട്ടുപോയ എംടി എന്തൊരു നിര്‍ഭാഗ്യവാന്‍ എന്നും നമുക്കുതന്നെ തോന്നും.
കുറെനാളുകഴിഞ്ഞ്‌ ഇപ്പോള്‍ പ്രസിഡന്റായി തെരഞ്ഞെടുക്കപ്പെട്ട സുനില്‍ ഗംഗോപാധ്യായ എന്ന ബംഗാളി പ്രസിഡന്റ്‌ സ്ഥാനത്തിരുന്ന്‌ ചീഞ്ഞ തക്കാളിപോലെ നാറുന്നതും നമ്മള്‍ കാണും. അന്നേരം എംടി എന്തൊരു ഭാഗ്യവാന്‍ എന്നു തോന്നും.
ഒക്കെയും ഒരു തോന്നലാണ്‌.
ലക്ഷക്കണക്കിന്‌ ഭക്തജനങ്ങളുടെ അഭയവും ആശാകേന്ദ്രവുമായ ശ്രീപൂര്‍ണത്രയീശന്റെ സങ്കടം ആരറിയുന്നു.
പത്തും പതിനായിരവുമല്ല പത്തു ലക്ഷത്തില്‍പ്പരം രൂപയുടെ സങ്കടമാണ്‌ ഭഗവാനെ മഥിക്കുന്നുണ്ടാവുക. ഭഗവാനെ എഴുന്നുള്ളിക്കുന്ന സ്വര്‍ണക്കോലത്തില്‍നിന്നും ഒരു കിലോ 56 ഗ്രാം 374 മില്ലിഗ്രാം സ്വര്‍ണമാണ്‌ ചില ഭക്തന്മാര്‍ അടിച്ചുമാറ്റിയിരിക്കുന്നത്‌.
പകരം സ്വര്‍ണം മുക്കിയ മകുടം സ്ഥാപിച്ച്‌ ഭഗവാനെ പറ്റിക്കുകയും ചെയ്തു പഹയന്മാര്‍!
എന്തായാലും ഭഗവാന് വളരെ വേണ്ടപ്പെട്ടവര്‍ എന്നു നമ്മള്‍ കരുതിയിരുന്ന ആരെങ്കിലുമാവും ഭഗവാന്റെ സ്വര്‍ണം അടിച്ചുമാറ്റിയതെന്ന്‌ കണ്ടുപിടിക്കാന്‍ ക്രൈംബ്രാഞ്ചുകാര്‍ വേണ്ട!
സ്വര്‍ണം പോയതിലും ഭഗവാനു സങ്കടം കൂടെ നിന്നവര്‍ പാരപണിത കാര്യമോര്‍ത്തു തന്നെയാവണം! ഭഗവാന്റെ നിര്‍ഭാഗ്യം എന്നു പറയാന്‍വരട്ടെ. ഒരു കാര്യത്തില്‍ ഭഗവാന് ഭാഗ്യവാനാണ്‌. സ്വര്‍ണത്തിലാണ്‌ ഭഗവാന്റെ വിഗ്രഹം സ്ഥാപിച്ചിരുന്നതെങ്കില്‍ എന്തായിരുന്നേനെ സ്ഥിതി? ഇപ്പോള്‍ സ്വര്‍ണമകുടമല്ലേ അടിച്ചുമാറ്റിയുള്ളൂ. ഭഗവാനെതന്നെ അടിച്ചുമാറ്റാന്‍ വേണ്ടും ശക്തന്മാരല്ലോ ഭക്തന്മാര്‍!
0 comments :
Post a Comment