മണ്ടന്മാര്‍ ചൂണ്ടക്കാര്‍!
റോഡുവക്കില്‍ കേബിളിടാന്‍ തമിഴന്‍ കുഴിയെടുക്കണം. ഹോട്ടലുകളില്‍ അടുക്കളപ്പണിക്കും മേശതുടക്കാനും നേപ്പാളികള്‍ വേണം. കെട്ടിടം പണി മുതല്‍ മെയ്യനങ്ങിയുള്ള സകല പണികള്‍ക്കും ബീഹാറിയും ആന്‍ഡ്രാക്കാരനുമൊക്കെ വേണം!
കേരളത്തില്‍ 'ചൂണ്ട'യിടാന്‍ പോലും ആളെ കിട്ടാനില്ല. അതുകൊണ്ടു മാത്രമാണ്‌ കേരളക്കടലില്‍ ചൂണ്ടയിടാന്‍ ഇന്തോനീഷ്യയില്‍ നിന്നും ചൂണ്ടക്കാരെത്തിയത്‌!
പുറം കടലില്‍ ഒരുപാടു മീനുണ്ട്‌. പിടിക്കാനാളില്ല. മീന്‍ കിട്ടിയാല്‍ വറുത്തോ പൊരിച്ചോ തിന്നാന്‍ മാത്രം ആളുകളെമ്പാടുമുണ്ട്‌!
അഞ്ഞൂറ്റിയിരുപത്തഞ്ച്‌ കപ്പലുകളാണ്‌ പുറംകടലില്‍ ചൂണ്ടയിടാന്‍ എത്തിയിരിക്കുന്നത്‌. ട്യൂണ മത്സ്യത്തെ ചൂണ്ടയിട്ടു പിടിക്കാനാണ്‌ കേന്ദ്ര സര്‍ക്കാര്‍ ഇന്തോനീഷ്യന്‍ ചൂണ്ടക്കാരോട്‌ പറഞ്ഞത്‌.
ചൂണ്ടയില്‍ കൊത്തുന്ന മീനുകള്‍ കേന്ദ്ര സര്‍ക്കാരിന്റെ വിജ്ഞാപനം വായിച്ചിട്ടുണ്ടാവില്ല. അക്കാരണത്താല്‍ ചൂണ്ടക്കാര്‍ക്ക്‌ ട്യൂണ മാത്രമല്ല കടലിലുള്ള സകലയിനം മീനും കിട്ടാന്‍ തുടങ്ങി!
അസൂയക്കാരല്ലേ കേരളീയര്‍. ഇന്തോനീഷ്യന്‍ ചൂണ്ടക്കാര്‍ കടല്‍ അരിച്ചു പെറുക്കുന്നുവെന്ന്‌ കിംവദന്തി പരത്താന്‍ തുടങ്ങി!
നമ്മുടെ കടലില്‍ നിന്നും ചൂണ്ടയിട്ടു പിടിക്കുന്ന മീനെല്ലാം നമ്മുടെ കരയില്‍ ഇറക്കണമെന്നാണ്‌ നിയമം. ഇന്തോനീഷ്യന്‍ ചൂണ്ടക്കാര്‍ പാവങ്ങളായതിനാല്‍ മുനമ്പത്ത്‌ അഞ്ചു കോടി മുടക്കി സ്ഥലം വാങ്ങി. അവിടെ അഞ്ചേക്കറില്‍ സൗകര്യമുണ്ടാക്കി!
ചൂണ്ടയില്‍ കിട്ടുന്ന മത്സ്യങ്ങള്‍ കരയിലെത്തിക്കാന്‍ പത്തു ബോട്ടുകള്‍ക്കാണ്‌ കേന്ദ്ര സര്‍ക്കാര്‍ അനുമതി കൊടുത്തത്‌. കാശു തീര്‍ന്നു പോയ ചൂണ്ടക്കാരാവട്ടെ ഒരു ബോട്ടു മാത്രമാണ്‌ വാങ്ങിയത്‌.
ഇപ്പോള്‍ പറഞ്ഞു പരത്തുന്നത്‌ വേറൊരു ദുഷിപ്പാണ്‌. ഇന്തോനീഷ്യന്‍ ചൂണ്ടക്കാര്‍ക്ക്‌ ഒരു ബോട്ടല്ലാ, നൂറു ബോട്ടെങ്കിലും ഉണ്ടത്രെ. എല്ലാത്തിനും ഒരേ നിറം, ഒരേ വലിപ്പം, ഒരേ പേര്‌!
ഉച്ചിയില്‍ മറുകുള്ള എം പി നാരായണപിള്ളയുടെ 'പരിണാമ'ത്തിലെ മത്തായി പോലെ, എല്ലാ നക്സലൈറ്റുകളുടെയും പേര്‌ മത്തായി!
ഇന്തോനീഷ്യന്‍ ചൂണ്ടക്കാര്‍ക്ക്‌ ബുദ്ധി കുറവാണ്‌. അതിനാല്‍ മീന്‍ പിടിക്കുന്നത്‌ കമ്പ്യൂട്ടറൈസ്ഡ്‌ ചൂണ്ടയിട്ടാണ്‌. തങ്ങള്‍ കടലില്‍ ചെല്ലുമ്പോള്‍ വലയിലൊരു 'പൂച്ചുട്ടി' പോലും കുടുങ്ങുന്നില്ല എന്നൊക്കെപ്പറഞ്ഞ്‌ കുത്തിത്തിരിപ്പുണ്ടാക്കുകയാണിപ്പോള്‍ കേരളത്തിലെ മീന്‍ പിടുത്തക്കാര്‍!
കേരളത്തിലെ മീന്‍ പിടുത്തക്കാരേ വരിക. നിങ്ങളുടെ മീന്‍ പിടുത്തം നിര്‍ത്തുക. നിങ്ങളെ മനുഷ്യരെ പിടിക്കുന്നവരാക്കാം. ഉടന്‍ ഏതെങ്കിലും നെറ്റ്‌വര്‍ക്ക്‌ മാര്‍ക്കറ്റിംഗ്‌ കമ്പനിയില്‍ ചേരുക!
ഒരു മാസം കൊണ്ട്‌ ചൂണ്ടയില്‍ കുരുങ്ങുന്നത്‌ ലക്ഷക്കണക്കിന്‌ രൂപയാണ്‌. ഇതു നൊക്കൂ... കഴിഞ്ഞ ഒരാഴ്ചത്തെ ഡ്രാഫ്റ്റാണ്‌... വെറും രണ്ടര ലക്ഷം രൂപ!
ചൂണ്ടയിടാന്‍ ഇന്തോനേഷ്യക്കാര്‍ മരമണ്ടന്മാര്‍ തന്നെ നടക്കട്ടെ!
ജീവിതം ക്രിയേറ്റീവാക്കൂ...!!
1 comments :
വളരെ കാലികപ്രസക്തിയുള്ള ലേഖനം...അഭിനന്ദനങ്ങള്‍
Post a Comment