ആൾ ദൈവങ്ങളെ ആർക്കാണ്‌ പേടി?

സമ്മതിദായകരേയും നികുതിദായകരേയും കബളിപ്പിക്കുന്ന കാര്യത്തിൽ യുഡിഎഫ്‌ സർക്കാരിനെ നാണിപ്പിക്കുന്ന മികവും കൗശലവും കണിശതയുമാണ്‌ അച്യുതാനന്ദന്റെ നേതൃത്വത്തിലുള്ള ഇടതുപക്ഷ സർക്കാർ പ്രദർശിപ്പിക്കുന്നത്‌.

കൈയേറ്റക്കാർക്കും ചൂഷണ മാഫിയകൾക്കുമെതിരെ കാടിളക്കി നടപടി ആരംഭിച്ച്‌, പിന്നെ കാറ്റുപോയ ബലൂൺപോലെ, ഉളുപ്പില്ലാതെ പിന്മാറാൻ ഇവർക്കൊട്ടും മനസ്സാക്ഷിക്കുത്തില്ല.
മൂന്നാർ ശുദ്ധീകരണ പ്രക്രിയയിൽ ആരംഭിച്ച ഈ ജനകീയ വഞ്ചനയാണ്‌ ഇപ്പോൾ ആൾദൈവ മാഫിയകളെ, ആത്മീയ മാഫിയകളെ കൈകാര്യം ചെയ്യുന്നതിലും ഈ സർക്കാർ കാണിക്കുന്നത്‌. ഈശ്വരവിശ്വാസം വ്യക്തികളുടെ മാത്രം പ്രശ്നമാണ്‌. ഏതു മതത്തിലും വിശ്വാസ പ്രമാണങ്ങളിലും ജനങ്ങൾക്ക്‌ വിശ്വസിക്കാം.

എന്നാൽ ഈശ്വരവിശ്വാസത്തെ മുതലെടുപ്പിന്റെയും അടിച്ചമർത്തലിന്റെയും സാമ്പത്തിക ചൂഷണത്തിന്റെയും മാർഗമാക്കി, മുഖ്യധാര മതങ്ങൾ ഇവിടെ വിലസാൻ തുടങ്ങിയിട്ട്‌ നൂറ്റാണ്ടുകളായി. വ്യക്തിയുടെ വിവേകത്തേയും ശാസ്ത്രീയ ജ്ഞാനത്തേയും വിശ്വാസ പ്രമാണങ്ങളുടെ ബലത്തിൽ പുച്ഛിച്ച്‌ തള്ളി അവരെ അന്ധവിശ്വാസത്തിന്റേയും മുൻവിധികളുടേയും കള്ളികളിലടച്ച്‌ അധികാര രാഷ്ട്രീയത്തിന്റെ ഭാഗമായി മൂലധന സമാഹരണം നടത്തുകയാണ്‌ എല്ലാ മതങ്ങളും. മതങ്ങളുടെ ഈ ചൂഷണ പ്രക്രിയയ്ക്ക്‌ പുതിയ രൂപവും ഭാവവും നൽകി, ലൈംഗിക മുതലെടുപ്പ്‌ ഉൾപ്പെടെയുള്ള അധോലോക പ്രവർത്തനവും രാഷ്ട്രവഞ്ചനയും നടത്തുന്നവരാണ്‌ ആൾദൈവങ്ങൾ. സാമൂഹിക പ്രവർത്തനങ്ങളും ആതുരശുശ്രൂഷയും വിദ്യാഭ്യാസ പ്രവർത്തനങ്ങളും ഈ വഞ്ചനയ്ക്കവർ മറയാക്കുമ്പോൾ സാധാരണക്കാർ അന്ധിച്ചുനിൽക്കുക സ്വാഭാവികം.

ഈ ആന്ധ്യത്തിൽ നിന്ന്‌ മുതലെടുപ്പു നടത്തുന്നവരാണ്‌ കപടസന്യാസിമാരും സന്യാസിനിമാരും സിദ്ധന്മാരും പാസ്റ്റർമാരും. സന്തോഷ്‌ മാധവനും ഹിമവൽ ഭദ്രാനന്ദയും അറസ്റ്റിലായശേഷമാണ്‌ കേരളത്തിൽ ആത്മീയമാഫിയ നടത്തുന്ന കൊള്ളരുതായ്മകളും കള്ളത്തരങ്ങളും പൊതുജനങ്ങളറിഞ്ഞത്‌. അത്ഭുത രോഗശാന്തി മുതൽ ഉദ്ദിഷ്ടകാര്യത്തിനും ശത്രുസംഹാരത്തിനുമുള്ള പൂജയും ഏലസും വരെ നടത്തിയും നൽകിയുമാണ്‌ ഈ കള്ളപ്പരിഷകൾ വിലസിയിരുന്നത്‌. അതിശയകരമെന്നു പറയട്ടെ ഈ മാഫിയാ സംഘത്തിന്‌ സംരക്ഷണം നൽകുന്നത്‌ പോലീസിലെ ഉന്നതന്മാരും രാഷ്ട്രീയ നേതാക്കളും സിനിമാ-സാഹിത്യ മേഖലകളിലെ ഉന്നതന്മാരും എൽഡിഎഫ്‌ സർക്കാരുമാണ്‌.

സന്തോഷ്‌ മാധവൻ - ഹിമവൽ ഭദ്രാനന്ദ സംഭവത്തിനുശേഷം പോലീസ്‌ നടത്തിയ വ്യാപകമായ ആൾദൈവവേട്ടയിൽ കുടുങ്ങിയത്‌ 200 കള്ളന്മാരും കള്ളികളുമാണ്‌. എന്നാൽ ഇവരിൽ 25 പേരൊഴിച്ചുള്ളവരെയെല്ലാം പിടിച്ചതുപോലെ വിട്ടയച്ചിരിക്കുകയാണ്‌ പോലീസ്‌. ഈ 25 പേർക്കെതിരെ ചുമത്തിയിട്ടുള്ളത്‌ നിസാര കേസുകളും.

കഴിഞ്ഞമാസം, സ്പെഷൽ ബ്രാഞ്ച്‌ സംസ്ഥാന വ്യാപകമായി നടത്തിയ പരിശോധനയിൽ ഏതാണ്ട്‌ ആയിരത്തിഅഞ്ഞൂറിലധികം സിദ്ധന്മാരെക്കുറിച്ച്‌ റിപ്പോർട്ട്‌ നൽകിയിരുന്നു. ഇതിൽ പ്രഥമദൃഷ്ട്യ കേസ്‌ എടുക്കാൻ കഴിയുന്നതും അങ്ങേയറ്റം ദുരൂഹ സാഹചര്യത്തിൽ പ്രവർത്തിക്കുന്നവരുമായ ഇരുന്നൂറിലധികം പേരുണ്ടെന്നായിരുന്നു, വിവിധ ജില്ലകളിൽ നിന്നുള്ള റിപ്പോർട്ടുകൾ പറയുന്നു. എന്നാൽ ഇവരെയെല്ലാം റെയ്ഡ്‌ ചെയ്തുവെന്ന്‌ വാർത്ത വരുത്തി, പോലീസ്‌ പിൻവാങ്ങുന്ന കാഴ്ചയാണ്‌ കാണുന്നത്‌. ആത്മീയ മാഫിയയുടെ തട്ടിപ്പിനിരയായവർ, വ്യക്തമായ തെളിവുകൾ സഹിതം പരാതി നൽകിയിട്ടും ആൾദൈവങ്ങളെ അറസ്റ്റുചെയ്യാതെ, അറസ്റ്റുചെയ്താൽതന്നെ ജാമ്യം അനുവദിച്ച്‌ വൻതോതിലുള്ള കബളിപ്പിക്കലാണ്‌ പോലീസും സർക്കാരും നടത്തിയത്‌.

കാരണം ആഭ്യന്തരമന്ത്രിയുടെ പുത്രന്റെ വിവാഹ മുഹൂർത്തവും വീട്‌ മാറ്റവും മുതൽ വനിതാ ഐജിക്ക്‌ അരയിൽ ഏലസുകെട്ടി കൊടുക്കുന്നതുവരെ ഇത്തരം കപടസന്യാസിമാരോ സിദ്ധന്മാരോ ആണ്‌. കോടിയേരി ബാലകൃഷ്ണനെ 'ഏട്ടൻ' എന്ന്‌ വിളിക്കാൻപോലുമുള്ള സ്വാതന്ത്ര്യം ഇവരിൽ ചിലർക്കെല്ലാമുണ്ടെന്നോർക്കുക. സാം ക്രിസ്റ്റി ഡാനിയേലിനെപോലെയുള്ള മുതിർന്ന പോലീസുകാർ, ഈ കള്ളന്മാരുടെ കല്യാണത്തിന്‌ മേൽനോട്ടം വഹിക്കാനെത്തുമ്പോൾ, ആത്മീയ മാഫിയയും ഭരണക്കാരും പോലീസും തമ്മിലുള്ള അവിഹിതബന്ധം ഊഹിക്കുക.

അച്യുതാനന്ദന്റെ ഭരണകാലത്ത്‌ പെൺവാണിഭക്കാർക്കെന്നപോലെ ആത്മീയ മാഫിയാസംഘത്തിനും നാടടക്കിവാഴാം എന്ന്‌ സാരം.

ആവർത്തിക്കുന്ന ഈ വൃത്തികെട്ട ഭരണസംവിധാനത്തെ അധികാരത്തിലേറ്റാൻ മാത്രം എന്ത്‌ അപരാധമാണ്‌ (വോട്ടുചെയ്തതൊഴിച്ചാൽ) കേരളം ചെയ്തത്‌ - ജനങ്ങൾക്ക്‌ അവരർഹിക്കുന്ന ഭരണകർത്താക്കളെ ലഭിക്കുമെന്ന ചൊല്ല്‌ ഒരിക്കൽകൂടി അന്വർത്ഥമാകുമ്പോൾ, ഊറിച്ചിരിക്കുകയാണ്‌ ഈ കള്ളകാപാലിക - ആത്മീയ മാഫിയ.